2023 жылғы 20 желтоқсанда Президент Қасым-Жомарт Тоқаев отандық бизнес-қоғамдастық өкілдерімен кездесу өткізді, онда ұлттық экономиканың сапалы және тұрақты дамуы мәселелері талқыланды.
Атап айтқанда, кәсіпкерлер макроэкономикалық саясат, соның ішінде жаңа Салық кодексін әзірлеуге және экономиканың нақты секторына қолжетімді несие беруге қатысты пікірлерін ортаға салды. Экономиканың жаңа құрылымын қалыптастыру аясында жүйелі цифрландыру, көлік-логистика саласын белсенді түрде дамыту, агроөнеркәсіп кешенінің әлеуетін толыққанды пайдалану, экономиканы индустрияландыру, әсіресе, отандық автомобиль өнеркәсібін ілгерілету мәселелері көтерілді.
IITU Alumni Association төрағасы және ХАТУ-ның көрнекті түлегі Аманбек Хуанышбек іс-шараға белсене қатысып, IT-саладағы мәселелер мен перспективалар туралы баяндама жасады. Ол IT-мамандарды даярлау саласында мұғалімдерді ынталандырудың маңыздылығын ерекше атап өтті.
Талқылауды қорытындылай келе, Президент Тоқаев Аманбек пен басқа да қатысушылар айтқан ұсыныстар қорытылып, олардың негізінде нақты шаралар қабылданатынын атап өтті.
Аманбек Хуанышбек сияқты көрнекті түлектер Қазақстанда IT-саланың дамуына елеулі үлес қосуда, және біз мұны ерекше мақтан тұтамыз.
