2026 жылғы 31 наурыз бен 2 сәуір аралығында Алматыдағы Халықаралық ақпараттық технологиялар университетінде (ХАТУ) Erasmus+ KA2 «Әлеуетті арттыру» бағдарламасы аясындағы «Орталық Азияның цифрлық еңбек нарығы үшін киберқауіпсіздік саласындағы инновациялық магистратура білім беру бағдарламасын әзірлеу» жобасы бойынша халықаралық семинар өтті.

Семинардың мақсаты — киберқауіпсіздік бойынша білім беру бағдарламаларын цифрлық еңбек нарығының талаптарына сәйкес жетілдіру және жаңғырту, сондай-ақ Орталық Азия мен Еуропалық одақ жоғары оқу орындары арасындағы академиялық ынтымақтастықты нығайту.

Іс-шараға Испания, Италия, Румыния, Өзбекстан және Қырғызстандағы серіктес университеттер мен ұйымдардың өкілдері қатысты.

Семинар барысында қатысушылар Орталық Азия университеттерінде киберқауіпсіздік бойынша білім беру бағдарламаларын дамыту жоспарларын қарап, оқу бағдарламаларын жобалау мен оқыту әдістемелерінің заманауи тәсілдерін талқылады.

Ерекше назар аударылған мәселелер:

• жоба аясында жүргізілген аналитикалық зерттеулердің нәтижелерін таныстыру;
• білім беру бағдарламаларын әзірлеудегі үздік тәжірибелермен алмасу;
• қоғамдық сұраныс пен хабардарлықты бағалайтын сауалнамалардың аралық нәтижелерін талқылау;
• жобаны одан әрі жүзеге асыру бойынша практикалық ұсынымдар әзірлеу.

Семинар қорытындысы бойынша қатысушылар жобаның келесі кезеңдеріне қатысты ортақ көзқарас қалыптастырып, киберқауіпсіздік бойынша білім беру бағдарламаларын дамытудың басым бағыттарын айқындады және жоба мақсаттарына жету бойынша келесі қадамдарды келісті.

Жобаны жүзеге асыру киберқауіпсіздік саласындағы білім сапасын арттыруға және цифрлық экономиканың өзгермелі сын-қатерлеріне сай жоғары білімді дамытуға ықпал етеді.