Халықаралық ақпараттық технологиялар университеті әлемдік білім беру жүйесіндегі белсенді серіктестігін жалғастыруда. 15–19 маусым аралығында Мадридте (Испания), Мадрид политехникалық университетінде (UPM) халықаралық «Cyber4CA» жобасы аясында оқытушыларға арналған ауқымды оқыту семинары өтті. Семинарда ХАТУ-ды жоба мүшелері Жадыр Онтебаев, Жанұр Манапбаев және Шәкірт Мәликенов таныстырды. Жобаның басты міндеті — Орталық Азияның цифрлық еңбек нарығы үшін киберқауіпсіздік бойынша инновациялық магистратура білім беру бағдарламаларын әзірлеу және енгізу.

Білім алмасу алаңы Қазақстан, Өзбекстан, Қырғызстан, Италия, Бельгия және Румыния университеттерінің өкілдерін біріктірді. Іс-шараның бірінші күні серіктес елдердің білім министрліктерінің өкілдері өз елдерінде білім беру бағдарламаларын әзірлеудің стратегиялық тәжірибесімен бөлісті. UPM киберқауіпсіздік магистратурасы бағдарламасының жетекшілері Виктор Вильягра мен Диего Ривера, сондай-ақ профессор Слободан Боянич заманауи еуропалық стандарттарға сай үлгілік оқу бағдарламасын таныстырды. Семинар теориялық мәселелермен шектелмей, университеттерде заманауи киберзертханалар құру, бұлттық қауіпсіздікті қамтамасыз ету және IoT қауіпсіздігін басқару бойынша практикалық оқытуды да қамтыды.

Бес күндік кездесу халықаралық ынтымақтастықты нығайтып, университетімізге киберқауіпсіздік саласында заманауи әрі бәсекеге қабілетті мамандар даярлаудың жаңа мүмкіндіктерін ашты. Жоба аясында ХАТУ командасы озық цифрлық білім беру бағдарламаларын дамытып, зертханалық инфрақұрылымды жаңғыртуды көздейді. Жобаның басты ұраны — «Advancing Cyber Security Education for the Digital Future» («Цифрлық болашақ үшін киберқауіпсіздік білімін дамыту»).