IT- сарапшы Шымкент қаласында Akelius languages бойынша бірқатар тренингтер өткізді

2022 жылғы 20-21 мамырда ХАТУ-дың IT маманы Алтынбек Назарбай Шымкент қаласына сапары барысында орыс тілінде сөйлей алмайтын 5 жастан 17 жасқа дейінгі балалардың сауаттылығын арттыру бойынша пилоттық жобаның қатысушылары болып табылатын қаланың үш мектебінде Akelius languages бойынша тренингтер өткізді.

Алтынбек Назарбай үш білім ошағында, атап айтқанда - Мағжан Жұмабаев атындағы № 39 орта мектебінде, № 50 мектеп-гимназиясында және Рысбек Мырзашев атындағы № 76 орта мектепте болды. Тренинг аясында ол гаджеттер мен платформаларды сабақтарда қолдануға қатысты мұғалімдердің техникалық жағынан барлық сұрақтарына жауап берді.

«Akelius» қоры, ЮНИСЕФ және ХАТУ мамандары жүзеге асырып жатқан курс мектеп бағдарламасына күрделі бейімделетін балалардың сауаттылығын арттыруға бағытталған. Бұл курс Қазақстанда 2021 жылдың қыркүйегінен бастап тоғыз пилоттық мектепте қолданылып жатыр. Жоба соңына дейін (2023 жылдың ақпаны) 250 бала осы курсты аяқтайды деп күтілуде. Енді Akelius платформасында A0, A1, A1.1, A2 (негізгі) және B0 (орта) деңгейлері қолжетімді.