Халықаралық ақпараттық технологиялар университеті халықаралық байланыстарды кеңейту аясында маңызды қадам жасады. КНУБА (Киев ұлттық құрылыс және сәулет университеті) ректоры Алексей Днипровтың Қазақстан Республикасына ресми сапары барысында екі жоғары оқу орны арасында өзара түсіністік туралы Меморандумға қол қойылды. Бұл келісім заманауи технологиялық шешімдер мен инфрақұрылымды дамыту бағытында жаңа мүмкіндіктерге жол ашады.

Ынтымақтастық аясында инженерлік және цифрлық технологиялардан бастап урбанистика мен әлеуметтік ғылымдарға дейінгі өзекті салалар қамтылады. Негізгі назар құрылыс, сәулет, қала құрылысы және инфрақұрылымды цифрлық трансформациялауда қолданылатын іргелі әрі қолданбалы зерттеулерге аударылмақ. Университеттер ғылыми жұмыстардың нәтижелерімен және озық тәжірибелерімен белсенді түрде бөлісуді жоспарлап отыр.

Академиялық ұтқырлық бағдарламасы да серіктестіктің маңызды бөлігі болмақ. Студенттер, оқытушылар мен ғалымдар алмасу бағдарламаларына, ғылыми тағылымдамаларға, бірлескен конференциялар мен семинарларға қатыса алады. Сонымен қатар, докторанттарға бірлесіп ғылыми жетекшілік ету, жас зерттеушілерді жобаларға тарту және пәнаралық эксперименттер алаңына айналатын жаңа ғылыми зертханалар мен орталықтар ашу көзделіп отыр. ХАТУ Орталық Азиядағы цифрлық технологиялар мен жасанды интеллект саласындағы жетекші орталық ретінде бұл серіктестік арқылы өзінің халықаралық деңгейдегі рөлін нығайта түспек.