Қазақстан Республикасы Президентінің тапсырмасын орындау және Республика күніне орай ҚР Ғылым және жоғары білім министрі Саясат Нұрбек 16 жас ғалымға пәтер сертификаттарын салтанатты түрде табыстады. Марапатталғандардың арасында Халықаралық ақпараттық технологиялар университетінің (IITU) докторанты Дана Цой бар.
Өз сөзінде министр елімізде ғылым мен жоғары білімді дамыту мемлекеттің басым бағыттарының бірі екенін және жас зерттеушілер үшін қолайлы әлеуметтік жағдай жасау талантты жастарды қолдаудың маңызды тетігі болып табылатынын атап өтті.
«Отандық ғылымның дамуына серпін беріп жүрген көрнекті тұлғалардың еңбегі лайықты бағаланып, олардың жетістігі жас буынға өнеге, ел абыройының айғағына айналды», – деді Саясат Нұрбек.
Дана Цой сынды дарынды докторанттардың жетістіктері IITU-дың жоғары дайындық деңгейі мен ғылыми әлеуетін көрсетеді. Университет басшылығы жас зерттеушілерді кәсіби және жеке өсуіне жағдай жасап, ғылыми жобаларға, гранттарға және халықаралық бастамаларға белсенді түрде тартып қолдайды.
