Халықаралық ақпараттық технологиялар университетінде (IITU) жастардың қаржылық сауаттылығын арттыруға және киберқауіпсіздік мәдениетін қалыптастыруға бағытталған «Сандық кеңістіктегі қаржылық қауіпсіздік» тақырыбында кездесу өтті.
Іс-шараға Антифрод орталығының, қаржы ұйымдарының, Қаржы нарығын реттеу және дамыту агенттігінің, сондай-ақ Алматы қаласы Полиция департаментінің киберқылмысқа қарсы күрес басқармасының өкілдері қатысты.
Кездесу барысында спикерлер онлайн-банкингті қауіпсіз пайдалану ережелері, қаржылық алаяқтық түрлері мен олардан қорғану тәсілдері туралы пайдалы ақпаратпен бөлісіп, студенттердің сұрақтарына жауап берді. Сонымен қатар қатысушыларға цифрлық және қаржылық қауіпсіздік тақырыбын ашатын бейнероликтер көрсетілді.