2025 жылдың наурыз айының басында «ХАТУ» АҚ-ның әдістемелік және тіл маманы, TESOL магистрі, Тілдер кафедрасының аға оқытушысы Айнабаева З.М. Астана, Алматы және Шымкент қалаларының мектеп мұғалімдерімен сұрақ-жауап форматында онлайн кеңестер жүргізді. Кеңестердің негізгі мақсаттары: 2025 жылғы қыс мезгілінде өткізілген тренингтердің қорытындысын шығару; оқытудағы негізгі аспектілерді айқындайтын ашық диалог түріндегі пікір алмасу ұйымдастыру; деңгейі әртүрлі сыныптар мәселесін шешуде Akelius платформасын қолдану және басқа да маңызды мәселелерді талқылау болды.
Кеңес жұмысына Akelius платформасын қолданатын мектептердің мұғалімдері, сондай-ақ ЮНИСЕФ басшылығымен жүзеге асырылып жатқан жобаның бірінші кезеңінің кураторлары, екінші және үшінші кезеңдерінің қатысушылары қатысты.
Айта кету керек, Алматы, Астана және Шымкент қалаларының мектеп мұғалімдері заманауи аралас оқыту модельдерін тек нұсқаулық бойынша ғана емес, шын ықыласпен меңгеріп, енгізе бастады. ЮНИСЕФ қолдауымен, «ХАТУ» АҚ-ның тілдік және әдістемелік сарапшыларының қатысуымен өткен тренингтер мұғалімдерге тек жаңа әдістемелерді ғана емес, өзгерістерге деген шабытты да сыйлады. Назар аударылатын басты мәселе – деңгейі әртүрлі оқушылар оқитын сыныптарда білім беру міндеттерін шешу. Бұл орайда мұғалімдерге Akelius цифрлық платформасы мен заманауи жасанды интеллект технологиялары көмекші құрал ретінде ұсынылып отыр. Олар оқу үдерісінің сенімді серіктесіне айналуда. Ұсынылған тәсілдер арасында «Станциялар ротациясы» моделі ерекше танымалдыққа ие болды. Мұғалімдер бұл әдісті икемділігі мен сабақ қарқынын сақтауға, оқушылардың назарын тұрақты ұстап тұруға мүмкіндік беретіні үшін жоғары бағалады.
Қазіргі педагогикалық тәсілдерді қазақстандық мектептерге енгізу аясында аралас оқыту модельдерімен үйлескен Akelius цифрлық платформасын қолдану кеңінен танымал бола бастады. ЮНИСЕФ қорының қолдауымен жүзеге асырылып жатқан бұл бастама қазіргі мектептің негізгі міндеттерінің бірі – деңгейі әртүрлі оқушылардан құралған сыныптарда тиімді жұмыс жүргізу мәселесін шешуге нақты көмек беруде. Мұғалімдердің байқауынша, Akelius платформасы оқушылардың, әсіресе бұрын шет тілдерін үйренуде қиындық көргендердің қызығушылығы мен белсенділігін арттыруға оң әсерін тигізуде. Педагогтар бастапқыда дайындық деңгейі төмен оқушылардың сөздерді сенімді түрде қайталап, тапсырмаларға қызығушылық танытып, біртіндеп тілдік кедергілерді жеңіп жатқанын таңданыспен атап өтті. Алайда, платформаның пайдалы тұстары анық көрінгенімен, мазмұнды бейімдеуден бастап сыныптардың техникалық жабдықталуын арттыруға дейін әлі де шешілуі тиіс бірқатар мәселелер бар. Жасанды интеллект (ЖИ) технологияларының білім беру тәжірибесіндегі әлеуеті — талқылаудың жеке бағытына айналды. Тренингке қатысушылардың көбісі ChatGPT, Canva, OneNote сияқты құралдармен алғаш рет танысып, оларды күнделікті сабақ жоспарына енгізе бастады. Бұл өз кезегінде визуализация, жоспарлау және оқу үдерісінің интерактивтілігін арттырудың жаңа мүмкіндіктерін ашты. Инклюзивті білім беру тақырыбы да маңызды орын алды. Мұғалімдер Akelius платформасын инклюзивті білім беру жүйесіне тиімді енгізу үшін қосымша ресурстар қажет екенін баса айтты: қосымша интерактивті ойындар мен мәтіндер, планшеттерге қолжетімділік, сапалы техникалық қолдау және т.б. Бұл ұсыныстар қорытынды онлайн-кеңестер барысында көтерілді, және мұғалімдер белсенді түрде өз ойларымен бөлісті. Менторлық пен тәжірибе алмасу мәселесіне де ерекше назар аударылды. Көптеген мұғалімдер цифрлық технологияларды әрі қарай пайдалануға ғана емес, өз нәтижелерімен бөлісуге де дайын екендіктерін білдірді. Алда – 2025 жылдың сәуірінде өтетін конференция, онда инклюзивті тәжірибе, ЖИ және менторлық тақырыптары бойынша баяндамалар жоспарлануда.
Осылайша, өткізілген тренингтер мен кейінгі консультациялар жай ғана оқыту шаралары емес, Қазақстандағы білім беру ортасын трансформациялаудың маңызды кезеңіне айналды. Мұғалімдер жаңа цифрлық құралдарды меңгеріп қана қоймай, аралас оқытудың мүмкіндіктеріне жаңаша көзқараспен қарап, оны тек платформа аясында ғана емес, одан тыс жерде де қолдану жолдарын қарастыра бастады. Бүгінде көптеген педагогтар Akelius платформасын әрі гибридті форматта, әрі дәстүрлі сабақтар аясында белсенді түрде қолдануын жалғастыруда. Бұл өз кезегінде аталған технологияның икемділігі мен қазіргі білім беру міндеттерін шешудегі әлеуетін дәлелдейді.