Толықтырылған шынайылық технологиясын қолдана отырып, машиналық оқыту негізінде музей келушілеріне арналған мобильді зияткерлік сервистерді әзірлеу

Заманауи ақпараттық технологиялардың қарқынды дамуы пайдаланушылардың құрылғылармен әрекеттесуінің жаңа тәсілдерінің, яғни адам мен компьютердің қарым-қатынасының жаңа интерфейстерін әзірлеуді талап етеді. Адам мен компьютердің өзара әрекеттесуінің жаңа тәсілдері әдеттегі графикалық мәзірлерді, пішіндерді немесе құралдар панельдерін пайдаланбайды. Олар тек адам қарым-қатынасына тән өзара әрекеттесу әдістеріне негізделген, яғни дәстүрлі басқару элементтерінің орнына оқыту мысалдары, ым-ишара, адам тілі қолданылады. Осы жобада әзірленетін машиналық оқыту және толықтырылған шынайылық технологиясы негізіндегі ұялы телефонға арналған мамандандырылған сервистер, сондай-ақ Виртуалды музей музей экспонаттарын виртуалдандыру және оларды толықтырылған шынайылық технологиясын тарта отырып көрсету арқылы, әсіресе жастар ортасында Қазақстан Республикасының мәдени мұрасын сақтау мен насихаттауға бағытталған.

Жоба міндеттері

• Өңірлердің тарихи мұрасын сақтау аясында мобильді музей қосымшаларын әзірлеу саласындағы әлемдік тәжірибені зерттеу және талдау (виртуалды музейлер, виртуалды тарихи ландшафтар, виртуалды сәулет ескерткіштері, виртуалды интерьерлер және т.б.).
• Объектілердің жеңілдетілген 3D-модельдерін, сондай-ақ объектілерді сканерлеу деректерін пайдалана отырып, толықтырылған шынайылық технологиясы негізінде шынайы әлем объектілеріне қатысты визуалды виртуалды объектілерді дәл орналастыру алгоритмін әзірлеу.
• Объектілердің жеңілдетілген 3D-модельдері мен музей экспонаттары сипаттамаларының деректер базасын пайдалана отырып, сәйкестендірілген объектілердің параметрлерін анықтау алгоритмін әзірлеу.
• Мобильді құрылғы камерасының көмегімен музей экспонаттарын жіктеу мен сәйкестендіруді жүргізуге мүмкіндік беретін жасанды интеллект негізіндегі модульді пайдалана отырып, «Виртуалды музей» мобильді қосымшасын әзірлеу, оның ішінде қосымша жинайтын объектілер туралы деректер негізінде желіні қосымша оқыту алгоритмін әзірлеу.
• «Виртуалды музей» әзірленген мобильді қосымшасына тестілеу жүргізу. «Виртуалды музей» әзірленген қосымшасын пайдалану бойынша құжаттама жазу.

Жаңалығы

Ғылыми жаңалығы аппараттық және уақыт шығындары азайтылған, нақты уақыт режимінде жұмыс істейтін мобильді құрылғыларға арналған машиналық оқыту негізіндегі модельдерді әзірлеуден, оқыту үшін қажетті деректер көлеміне қойылатын талаптарды азайтудан және цифрлық музейді іске асыру үшін толықтырылған шынайылық технологиясын енгізуден тұрады.

Осы саланың қазіргі жағдайын түсіну және талдау, сондай-ақ әзірленетін шешімге қойылатын талаптарды қалыптастыру мақсатында мәдени ұйымдарға, атап айтқанда музейлерге арналған қолданыстағы мобильді қосымшаларға әдеби шолу жүргізілді. Ұсынылған ұқсас өнімдерді зерттеу және талдау музей экспонаттарының классификаторларын әзірлеуге арналған қолданыстағы шешімдер, әзірленетін бағдарламалық шешімдердің архитектурасы мен іске асырылуы, олар ұсынатын функционал, оларды енгізу алаңы болып табылатын мәдени ұйымдар сияқты әртүрлі аспектілерде жүргізілді.

Талдау нәтижелері бойынша «Виртуалды музей» қосымшасына қойылатын жалпы талаптар әзірленді. Соңғы пайдаланушы тарапынан әзірленетін жүйеге қойылатын бизнес-талаптар сипатталды, музей келушілерінің мінез-құлық сценарийлерінің ықтимал түрлері, сондай-ақ әзірленетін қосымша тарапынан қажетті нәтиже (жауап) анықталды. Болашақ қосымшаның тұжырымдамалық моделі әзірленді.

Сондай-ақ интерфейс қосымшаға толықтырылған шынайылық технологиясын енгізу тұрғысынан қарастырылды, яғни тұжырымдама танылған және жіктелген экспонаттардың модельдерін және олар туралы қосымша ақпаратты интерфейске енгізуді ескере отырып толықтырылды.