22 шілдеде Халықаралық ақпараттық технологиялар университеті базасында сарапшылар, IT-кәсіпкерлер және еліміздің технологиялық экожүйе өкілдерінің қатысуымен дөңгелек үстел өтті. Іс-шара «TechnoWomen» коммерциялық емес ұйымының бастамасымен Қазақстан Республикасының IT-бизнесін 2029 жылға дейін дамытудың Стратегиялық күн тәртібін әзірлеуге арналды.
«TechnoWomen» ұйымы — Орталық Азияның ICT нарығында сандық экономиканы, электрондық коммерцияны дамыту және бірыңғай өңірлік IT күн тәртібін қалыптастыру мәселелерін ілгерілететін жалғыз қауымдастық. Бүгінде өңір елдерінің экономикалық интеграциясы тұрақтылық пен қауіпсіздіктің маңызды факторына айналуда. Бұл үдеріс Орталық Азия елдері арасындағы үздіксіз мемлекеттік-жекешелік диалог үшін құрылған B5+1 (Business 5+1) көпжақты платформасы аясында ерекше маңызға ие.
Сараптамалық кездесу шеңберінде технологиялық индустрияның 20 жетекші өкілі сала дамуының басымдықтарын, қолданыстағы кедергілерді талқылап, мемлекет пен бизнеске арналған практикалық ұсыныстарды тұжырымдады.
ХАТУ цифрлық білім берудің көшбасшысы әрі Қазақстанның IT-экожүйесінің белсенді қатысушысы ретінде мұндай стратегилық сессияларды өткізудің негізгі алаңы болып табылады.
